01 CHIRSCHI

Ds Läbe isch fasch chli wie nes Chirschi
lah ds Chörbli drum lah Chörbli si
gschider nüt schaffe u ds Chörbli blibt läär
dür ds Himustor chasch eh nid mitnäh

Ja ds Läbe isch fasch chli wie nes Chirschi
we's gässe isch, isch's wäg
u ds Chörbli nützt nüt bim Petrus obe
wüu d's abgäh muesch ar Garderobe

Ja ds Läbe isch fasch chli wie nes Chirschi,
biss drii u nimm's voll easy.



02 HAHNEWASSER

Hahnewasser, Füür im Dach
Hahnewasser, i gseh zwöifach
uh uh uh uh
Jesses Gott oh nei

Hahnewasser, Blöd im Chopf ja
Hahnewasser, i cha nümm Gopf
uh uh uh uh
i gloub i cha nümm hei

U Mann wo isch äch itz mis Babyfon?
Wo si mini beide Söhn?
I ha im Chopf es richtigs Babylon
u glich dünkt's mi no schön ja

Hahnewasser, aus verschobe
Hahnewasser, nüt mit vogle
uh uh uh
eis Glesli nimi no



03 CHÄTSCH DÄ CHÄTSCHI

Chätsch chätsch chätsch chätsch dä Chätschi
Chätsch chätsch chätsch chätsch dä Chätschi
Chätsch chätsch chätsch chätsch dä Chätschi
Chätsch chätsch chätsch chätsch

Chätsch chätsch chätsch chätsch....

Pack ne us, ab i ds Muu, je grösser desto fägt
Nächär blase bis a d'Nase u plötzlech Päng u dr Chätschi wäg

Chätsch chätsch chätsch chätsch....

Tönt nach Heidespass hey Mann!
Gib mer o chli Bubble Gum
S'nimmt mi Wunder was da dran
därewä tonners superfun

Auso guet chasch eine ha
muesch z'Muu eifach locker lah
locker lah u nächär chasch
chätsche bis de nümme masch

Chätsch chätsch chätsch chätsch....



04 I CHA NÜMM LUSCHTIG SI

I cha nümm luschtig si
ha gmerkt das geit für mi
fasch nume denn no, we du nid läär bisch

Mir hei's doch lang schön ka
warum hesch müesse ga?
ja du verhaltisch di mängisch sältsam

Champagner het's, Wisswi het's o
u s'het o gnüegend Rotwii
Likör het's o, Bier sowiso
doch i wott di

I cha nümm luschtig si
u d'Öffnigszyte si
so zimlech Scheisse i gloub i stirbe.



05 I U MI FRÜND DER SUPERMARIO

Dir chöit mi aui chrüzwiis
ja dir vom Pickwick o
i ma nid mau dusche
zum Glück hani mi Fründ dr Mario
mir gumpe chopfvoraa a d Steine u vore i d Burg
ja i u mi Fründ dr Supermario

Zwüsch de Jalousie luter Lüt ufem Quai
I ha gar nid wöue luege
doch i hase gseh, oh Mario
chumm sofort zrügg uf ds Sofa mir müsse dene Qualle entcho
im achte Level, chumm itz
oh mi Supermario (chumm itz)

Hesch gseh wie die entspannt isch gsi?
die het sicher wider e Lover
Mario chumm mir sammle Pilze
bis das Game hie over
aber itz befreie mir die Prinzässin u aui si froh
D'Prinzässin, i u mi Fründ, dr Supermario
I u mi Fründ dr Supermario



06 BIG SISTER & BROTHER

Die scheiss Zytverschiebig, i verwütsche di nie
Okey haut uf d'Combox: „Wie oft dänksch du a mi?“

Hesch du ändlech nei gseit? Heit dir nomau küsst?
Schribt er geng no Emails? I wärfroh weni's itz wüsst

U bitte bis ehrlech, du weisch ja wie ni bi
we's mi tünkt, da stimmt öppis nid, de fahri gröber i

weisch i kenne d'Sunne, dr Mond kenni o
Big Sister und Brother, mis Detektivbüro

Sii luegt am Tag u är ir Nacht
i kenne kes Überwachigsteam, wo das besser macht

U we's mau e Nacht git, wo dr Mond früeh versinkt
de wotti's gar nid wüsse, machsch was di richtig tünkt.

de wotti's gar nid wüsse, machsch was di richtig tünkt.
machsch was di richtig tünkt.



07 MACH MAU CHLI FÜÜR

Mach mau chli Füür, Erfrierigsalarm
chli zündte, chli füürle u scho wird's hie warm
oh yeah, mau furt mit däm Schnee

Mach mau chli Füür, hie het's Papier
u Fichte u Bueche, süsch gfriere mir no
ii, lah ds Füür nid lah si

Mini Befürchtig ob ächt di Vorrat längi
isch itze nichtig, du hesch ja Holz jedi Mängi

Mach mau chli Füür, i ha Bänzin
dr Dechu geit linksum, lue s'het no drin
d' Klappe vou ufutue
blas vou dri u
lue wie's schön brönnt.



08 OH BABY BITTEE!

Chumm itz, chumm itz, das isch üsi Nacht
Chumm itz, süsch z'spät, scho viertelab Acht
Lue d'Luft isch vou vo Blüete
Dr Mond isch klar wie Kloss
Chumm itz, chumm itz, wüu itze geits los

Oh bitte Baby i cha nümme
Oh bitte Baby i möcht meh gseh
Oh bitte Baby nomau viu meh
Oh Baby bittee

I luege töif i di, nei säg nüt
S'isch aus scho gseit
I fänds guet we das dahie
no lang wyter geit.

Oh bitte lig mit mir i ds Chüssi
Oh bitte Baby bitte küss mi
Oh Baby wosch vo mir es Güetzi?
Oh Baby bittee

Weni mit dir bi, bini wie gkläpft
Oh bitte Baby schwümm i mim See
Oh Baby bittee.



09 GANG NID

Gang nid, bitte gang nid
No isches Nacht, niemer erwacht, hilf liisli si
Säg's nid, bitte säg's nid
I weiss scho es längt ei Vogu wo singt
u du geisch wäg vo hie

Gang nid, bitte gang nid
Dr Portier het üs nid gseh u d'Cherze längt
No nie, mi dünkt's no nie
hani sones Füür mit öpperem ka
bitte blib da.

Z'bereue git's nüt, s'git di und mi
U itz isch no hüt u morn git's nid

Gang nid, gib mer dini Hang
No einisch u fahr no einisch dür d'Haar u d'Füess ar Wand
S'git nüt, wie das hie git's nüt
Was i mir dir hie ha
drum blib no da u när...



10 OH MOND

Oh Mond, muess i di houe?
Du kennsch ja aui Froue
Oh Mond, säg weli passt zu mir

Oh Mond, du hälle Bleiche
mi Pfil sött itz mau preiche
Oh Mond, säg ändlech wo si steckt.

I luege dumm wo si när plötzlech dasteit
e super Frou mit allem drum u dra
u si fragt mi när was itz so abgeit
i säge nüt u dänke „läng mi a“

Oh Mond, du wissi Schibe
Mir zwöi, wei zäme blibe
Oh Mond, i säge beschte Dank.



11 GUET/SCHEISSE DRUFF

D Menü si gässe u d'Täuer si läär
drum isch mis Härz itz tuusig schwär
i weiss du bisch guet druff
u i bi scheisse druff

Dis Härz isch liecht itz u i ga i ds Puff
I däm Fall hilf nid mau früschi Luft
i weiss du bisch guet druff
u i bi scheisse druff

Du geisch i Usgang, machsch was de wosch
du kennsch ja Lüt meh aus gnue
I ga i Usgang mit mire Schwoscht u
i putze mi nume zue.

Doch einisch i säg der's isch's de umgekehrt
mir geit's de guet, du am Bode zerstört
denn bi de I guet druff
u du bisch scheisse druff.



12 EIS, ZWÖI, AUS ISCH WIE NÖI

Eis, zwöi aus isch wie nöi
d' Sunne schiint warum u weich
chumm mit zum Änteteich
U när gö mer i ds Heu

Drü, vier, säg weles Tier
möchtisch de du hüt si?
Vilich e Chue und i
wär zum Bischpil e Stier

Füf, sächs deräwä lätz
cha das mit üs nid si
sibe, acht u itz Guetnacht
mir schlafe zäme i

Nün, zäh, i wett no meh
mit dir i ds Heu ga lige
eis zwöi drü füf sächs sibe
mau fändi sehr schön



13 FÄNDI SEHR SCHÖN

I möcht geng dert si wo du bisch
mir dir ässe am gliche Tisch
möcht mit dir schwige wie ne Fisch
das fändi sehr schön

I möcht denn lache we du lachsch
Chatze bache we du se bachsch
u Liebi mache we du se machsch
das fändi sehr schön

I ha lang gforschet wie
nis de so wett u was
mi richtig glücklech miech
u ds Resultat isch das:

I möcht geng gränne we du grännsch
mi mit dir gräme we du di grämsch
möcht das erwähne wo du so erwähnsch
das fändi sehr schön
das fändi sehr schön
ja sehr schön
das fändi sehr schön.
SEHR SCHÖN
DAS FÄNDI: SEHR SCHÖN!
sehr schön
das fändi sehr schön.



14 MIR GHÖRE ZÄME

Zumne Alki ghört viu Durscht
Ines Oug ghört e Pfuuscht
ine Chuchi ghört es Gschirr
So wie du zu mir

Zumne Summer ghört es Gwitter
Zum Dritte Riich da ghört e Hitler
I Frouehals ghört ei Vampir
So wie du zu mir

Mir si so
Wie Muus und Haferstroh
Wie Popcorn und Kino
Du passisch zu mir, und ig o

Zumne Chauffeur ghört wüescht flueche
Zure Mueter ghört e Chueche
Zum Obelix ghört ei Menhir
So wie du zu mir.

Zu jedem Chind ghört e Hotzeplotz
I jedes Flugi es Seckli Chotz
I jedes Büro ghört Papier
So wie du zu mir.

Mir si so
Wie Aglio und Olio
Wie Pussy und Dildo
du passisch zu mir, und ig o

Oft ghöre Waffe zumne Mord
Und so wyter und so fort
mir ghöre zäme i zu dir
so wie du zu mir, so wie du zu mir



15 SCHMÄTTERLING VS. MÖNSCH

Mir gö uf d'Alp ganz leichten Schritts
Oh ds Matterhorn gseht us wie ächt
Es isch o ächt, seisch du zu mir
Ou Geo bini extrem schlächt (säg i)

I pfiffe mau e Melodie
du pfiffsch mit zwöiter Stimm schön dri
mir überlege üs ob mir
ab itze Schmätterlinge wei si

Mir gö i ds Tal, we's Abe wird
mir zünde aui Outos aa
mir bräche d'Tür vom Bellevue uf
u tanze dinne Cha-Cha-Cha

So itz mau hei, mir chlaue gschwing
chli Schläckzüg us der Drogerie u mir
dänke dass mir itze doch
no immer e chli Mönsch wei si.



16 DING DONG

Ding Dong Ding Dong
Dä gä dä gä ding ding dong
Ding Dong Ding Dong
Dä gä dä gä ding ding dong

Bi mir het's glüte, i Türe uftah
Dusse gschtange: Irgend e Ma

Ding Dong Ding Dong...

Dr Typ seit nüt, steit eifach dert,
E Typ wo glich wie ni usgseht

Ding Dong Ding Dong...

Ersch woner wäggeit, wird mer klar
Dä Typ bi ja ig, ke Seich, s'isch wahr

Ding Dong Ding Dong...

Ding Dong Ding Dong...

Itz lütet's scho wider, niemer da
I muess gloub mau i d'Psychi ga

Ding Dong Ding Dong...



17 I HA NE TON

I hane Ton, das isch mi Ton
e guete Ton fürne guete Song
das isch mi Ton

I hane Ton, das isch mi Ton
Mis Grammophon spilt nume dä Ton
dä einzig Ton

I hane Ton, das isch mi Ton
mi Ton isch dr Gipfel vo der Zivilisation

e Superton, i singe de Ton
i ds Telefon u ds Feuilleton fiiret mi u mi Ton

Oh los los los itz singi glich no süsch e Ton
dä wär vilech okey fürne anderi Person, doch

Das isch mi Ton, immer dä Ton
i gwinne mit däm Ton dr Grandprix
de la Chanson d'Eurovision



18 GSCHICHTSBÜECHER MY ASS

Dr Cäsar het viu kämpft u dr Stalin het viu kämpft
o i kämpfe wie ne Füsilier für di
doch i wott gar nid i d'Gschicht i ga, i wott lieber i di

Dr Churchill het regiert, dr Napoleon het regiert
u kämpft hei bekanntlech o si
we d'mi fragsch: Gschichtsbüecher my ass wüu i wott lieber i di

Nach mim Tod wird me mi vergässe
öppe nach füf Jahr
doch an sich findi's nid so schlimm wüu itz bini
hie u mache Love not War.

Dr Bach het komponiert, Chopin het komponiert
tuttiquanti ghocket geng am Klavier
doch i wott gar nid Klavier schpile, i schpile lieber mit dir

Dr Nietzsche het viu gschribe u dr Hegel het viu gschribe
ihri Büecher bedüte mir viu
doch i wott keni Bücher schribe, i wott mi Schriber i dir

I finde die Mönsche sehr guet
ussert dr Stalin dä isch doof
doch i säuber bi kes Giigewunder
u ke Staatsma u ke Filosof, drum:

Dr Federer het guet gspielt u dr Nadal äbefalls
zwifellos schöni Turnier
doch i wott bitte ke Spitzesport, i mache Sport mit
i wott bitte ke Spitzesport
I wott Sport mit dir mache



19 ZUCKER

Wide wide wei
Zucker uf de Bei
Zucker Morerei
so lang mir zwöi das wei

Wide wide waat
Zuckerfabrikat
Zucker füre Staat
u Zucker o privat

D'Rüebe isch scho grüschtet
nimm soviu di gluschtet

Wide wide wock
Zuckersaft im Schlafrock
aber o en bloc
Zucker als Zuckerstock.



20 WE D' ITZE WÄG GEISCH

We d'itze wäggeisch u eifach Tschüss seisch
Zur Türe usgeisch u dr Schlüssu wäg keisch
Hesch mini Händ nümm, hesch mini Küss nümm
Hesch mi o süsch nümm, ganz allgemein

Bisch när allei weisch, loufsch ufem Zahnfleisch
u ds Läbe fad verschteisch, we d' itze geisch
i fändi's schön we du no einisch überleisch
i bi dergäge, dass d' itze geisch.